آواز کی دوسری کڑی کے سلسلے میں سری لنکا کی دو قومی (اور سرکاری) زبانوں، سنہالہ اور تَمِل میں لکھے گئے جدید ادب سے چند نمایاں مثالیں پیش خدمت ہیں۔ بطور تعارف، سِنہالہ (جسے سنہالی بھی کہا جاتا ہے) ایک ہندآریائی زبان ہے جس کے ابتدائی نقوش تیسری صدی قبل از مسیح میں ملتے ہیں  جبکہ تمل (یا تامل) کا تعلق دراوڑی زبانوں کے خاندان سے ہے اور اس کا شمار دنیا کی قدیم ترین زندہ کلاسیکی زبانوں میں ہوتا ہے۔ سنہالہ اور تمل دونوں دو لسانی سطحوں والی یعنی ڈائی گلوسک زبانیں ہیں یعنی ان کی تحریری اور بولے جانے والی صورتوں میں بہت سے امتیازی فرق ہیں۔

دونوں زبانوں کے رسم الخط قدیم برہمی خط کی ارتقایافتہ شکل ہیں۔

سنہالہ اور تمل دونوں نے برصغیر ہند میں  آنکھ کھولی مگر سری لنکا کے جزیرے میں الگ تھلگ رہنے کی بدولت دونوں زبانوں میں بہت سی انفرادی خصوصیات نے جنم لیا۔ اس جزیرے کی حدود میں صدیوں کے باہمی ملن کی بدولت ایک دوسرے پر گہرا اثر چھوڑنے کے ساتھ ساتھ دونوں زبانوں نے ایک دوسرے سے کھل کر الفاظ، عبارات بلکہ قواعد بھی مستعار لئے ہیں۔

یہاں پیش کی گئی تحریریں سری لنکا میں رہنے والے چھ جدید تمل اور سنہالی ادیبوں کی ہیں۔ ہر تحریر کے ساتھ اس کے ماخذ کے متعلق بھی معلومات فراہم کی جا رہی ہیں۔ میں تمام مصنفین اور مترجمین (بالخصوص تمل کے مترجمین) کی ممنون ہوں جنہوں نے بخوشی اپنی تحریروں اور تراجم کے پاکستانی زبانوں میں ترجمے کی اجازت دی۔

ایک علاقے کے ادیبوں اور مترجمین کے درمیان باہمی تعاون ایک بہت مفید روایت ہے۔ اس سلسلے میں میں حماد رند کی مشکور ہوں جنہوں نے سری لنکا کے ادب کو ہمارے برصغیر میں زیادہ وسیع قارئین تک پہنچنے کا یہ شاندار موقع فراہم کیا۔

تحریر: گَیا ناگاہوَتّہ – ترجمہ :حماد رند –