۱

میں نے روٹی کا نوالہ ٹماٹر کے پتلے شوربے میں بھگویا اور ابھی اسے منہ میں رکھنے ہی والا تھا کہ دفعتاً ہوا میں جلتی شکر کی بو پھیل گئی۔ ساتھ ہی گنے کی فیکٹری سے بیلنا چلانے والوں میں سے کسی کی دلخراش چیخ ہوا میں بلند ہوئی۔ضرور کوئی حادثہ پیش آ گیا ہے۔ میں نے بےاختیار روٹی کا نوالہ بچے کھچے سالن کے ساتھ تام چینی کی پلیٹ پر رکھا اور اسے ایک طرف دھکیل کر دوبارہ فیکٹری کو جانا چاہا مگر کوشش کے باوجود میرے بدن میں کوئی حرکت پیدا نہ ہوئی، جیسےکسی نے میری پیٹھ بنچ سے چپکا دی ہو۔

اوہ …اوہ

سری دارا اکّا… سری دارا اکّا¹

جب میں نے سری دارا کا نام سنا تو میری پیٹھ فوراً لکڑی کے تختے سے اچھل پڑی اور میں بجری سے اٹے راستے پر چل پڑا۔ میں فیکٹری تک سرپٹ دوڑتا گیا۔ وہاں میری آنکھوں کے عین سامنے ہمارے ساتھ کام کرنے والے لڑکے لڑکیاں سری دارا کو سؤاسیوا وین میں ڈال رہے تھے جو کہ فیکٹری کی ملکیت تھی  اور ایسی ہی ایمرجنسی میں استعمال کیلئے رکھی گئی تھی۔ میری گھر والی مکمل طور پر گنے کے رس میں بھیگی ہوئی تھی۔ حتی کہ اس کی پلکوں سے بھی گاڑھا رس ٹپک رہا تھا۔

اس سے پہلے کہ میں کچھ سمجھ پاتا ہمارے عملے کی دو لڑکیاں سری دارا کے ساتھ وین کی طرف دوڑیں۔ جونہی دروازہ بند ہوا، وین تیزی سے گردوغبار کے بادلوں میں غائب ہو کر برُوُتھا جنکشن کی طرف روانہ ہو گئی۔

۲

مجھے بتایا گیا کہ سارا معاملہ سری گالا ہسپتال پہنچنے سے پہلے ہی ختم ہو گیا ۔ سچ کہوں تو ابھی انہوں نے سری دارا کو وین میں بھی نہیں ڈالا تھا کہ جنگل سے سرخ لپکوں والے شعلوں کی سی کانوں کو چیرتی ہوئی چیخ سنائی دی۔ تبھی میں سمجھ گیا تھا کہ وہ اب جیتی جاگتی گھر نہیں لوٹے گی۔ وہ اب جنازے کے نقاروں کی ہمراہی ہی میں اپنا گھر چھوڑ پائے گی۔

فیکٹری کہاں سے آئی؟ کیا بتاؤں؟ ہم اردگرد کے گاؤں دیہات  والوں کے دیکھتے ہی دیکھتے فیکٹری ہم پر کھاتاراگاما کے جنگل سے آئے کسی گہرے سیاہ بادل کی طرح نازل ہوئی  تھی اور آن کی آن میں ہماری نظروں کے سامنے اس کی جڑیں پلوتے² کے پورے علاقے میں پھیل چکی تھیں…کسی شہد کے مٹکے کے گرد جمع ہو جانے والی چیونٹیوں کی طرح پیسے کی مقناطیسی کشش ہم سب کو جوق در جوق کام کی تلاش میں فیکٹری کی طرف کھینچ لائی۔ جب تک ہمیں کچھ پلے پڑا کہ آخر  کیا ہو رہا ہے تب تک خود مینک دریا بھی الٹے دھاروں فیکٹری کی طرف چلنے لگا تھا…ہم سے تو مزاحمت کی توقع فضول تھی۔

۳

جس دن سے ہم نے اسے بتالا کے قبرستان کی خموشی میں اتارا …اس بات کو بھی پورے تین مہینے ہو چلے ہیں…سمجھو نیند مجھ سے روٹھ گئی۔ جب بھی آنکھیں موندتا ہوں وہ مجھے دکھائی دیتی ہے۔ میرے نتھنے شکر کی چپچپی ٹافی کی ابلتی بو سے بھر جاتے ہیں۔ وہ کسی روح کی طرح ہمارے باغ میں ظاہر ہو جاتی ہے۔ کونے میں لگے جافنا آم کے پیڑ کے نیچے۔ اور بس چپ چاپ ہی ظاہر نہیں ہوتی، گالیاں دیتی ہے، پھٹکارتی ہے۔ وہ اور گالیاں!جیتے جی کبھی اس نے کسی کو گالی نہیں دی تھی۔

!خدا کی مار پڑے …جل گئی میں

!پانی! کوئی پانی لاؤ

گنے کا رس میرے اندر جل رہا ہے۔

وہ مسلسل چیخے چلی جاتی ہے۔ ایک لمحے کو بھی چین نہیں لینے دیتی۔ بس اس وقت سے کوئی سکون کوئی آرام نہیں۔ صبح ہوتے تک بےخوابی کے مارے میرا سر چکرانے لگتا ہے۔ میں نے ذرا سا سونے  کیلئے ایک دوا ڈھونڈ لی ہے۔ کام کی شفٹ ہو یا نہ ہو میں اپنی چٹائی پر اسپیشل کی پوری بوتل چڑھا جانے کے بعد ہی دراز ہو پاتا ہوں جو میں راتھنائیکے کے غیرقانونی اڈے سے اپنی دھوتی کی تہوں میں چھپا کر لاتا ہوں۔ صبح کو میں اس کے آخری قطرے حلق میں انڈیلتا ہوں، کُمبوکن ندی کی نرم ملائم ریت سے دانت مانجتا ہوں اور رینگتے رینگتے فیکٹری چلا جاتا ہوں۔ ویسے بھی اب بڑی لڑکی اس قابل ہو چکی ہے کہ چھوٹی کا خیال رکھ سکے اور اسے اپنے ساتھ اسکول لے جائے۔

۴

مہاپنڈت، اسکول کے پرنسپل صاحب، گاؤں کے مُکھیا، وہ سبھی ایک ہی طرح کی صلاح دیتے ہیں۔ مندر جاؤ، بڑ کے مبارک پیڑ کے نیچے بیٹھو، ذہنی سکون کیلئے مراقبہ کرو۔ صحیح ہی تو ہے۔ مذہب ہی تو اصل دوا ہے۔ اس سے مجھے چین مل جانا چاہیئے۔ مگر جب بھی اپنی آنکھیں موندتا ہوں تو مجھے دس منٹ سے زیادہ آرام نہیں ملتا۔ پہلے تو سری دارا کی چیخیں کانوں میں پڑتی ہیں۔

جل گئی میں

پانی لاؤ

گنے کا رس میرے اندر اُبل رہا ہے۔

کمبوکن ندی کا ٹھنڈا پانی ڈالو مجھ پر۔

اب چھ مہینے ہونے کو آئے اور اس کی آواز کا بین اب بھی جاری ہے۔ مجھے ایک پل کو بھی چین نہیں کہ دو گھڑی سو سکوں، ذہنی انتشار ختم کر سکوں۔ اب یہ صرف میری عورت ہی کا معاملہ نہیں بلکہ وہ سب لوگ بھی جن سے ان کا جیون وقت سے پہلے چھین لیا گیا، میری سری دارا سے بھی پہلے ، وہ سب میرے سامنے آ کر روتے ہیں، بین کرتے ہیں، پھٹکارتے ہیں۔ کچھ عرصے سے تو وہ مجھ سے اپنی  نہ تھمنے والی اذیت کو روک دینے  کو بھی نہیں کہتے جسے انہیں اپنی آخری سانس تک جھیلنا پڑا۔ اب وہ بس یہ کہتے ہیں… یہ کہ۔۔۔

ایّا³ ہمیں فیکٹری کی وہ کبھی نہ تھمنے والی گڑگڑاہٹ چین نہیں لینے دیتی۔ اب تو تمہاری سری دارا بھی یہاں ہمارے درمیان آ لیٹی ہے ، اس لئے، اس لئے ہم تم سے التجا کرتے ہیں کہ اس مسلسل گرج کو روک دو۔

تو کون سا مراقبہ اور کیسا مذہب؟ ایک ایسے دیہاتی کے طور پر جس کیلئے اب اس دنیا میں اور کچھ نہیں رہا میں آہستگی سے آنکھیں موندتا ہوں اور غیرقانونی مال کے گھونٹ بھرنے لگتا ہوں۔

۵

اب یہ بھی نہیں کہ انہوں نے ہماری کوئی مدد  نہ کی ہو۔ مجھ سے کوئی اکیس بیس الگ الگ فارموں پر انگوٹھا لگوا کر فیکٹری نے مجھے ہرجانے کے طور پر تیس ہزار روپیہ دے دیا۔ جب یہ خبر گاؤں میں پھیلی تو ہمارے مندر کے مہاپنڈت ملنے کیلئے آئے۔

کہنے لگے، مورتوں والے کمرے کی بائیں دیوار پر اویچی دوزخ⁴ کی تصویریں نامکمل ہیں۔ انہیں ختم کرنے کیلئے کم از کم پچاس ہزار روپیہ مزید چاہیئے ہوگا۔ گونیرس، اگر تم باقی کے کام میں سری دارا کے نام پر اپنا حصہ بٹاؤ تو اس  کے صلے میں آئندہ کبھی کسی اور جیون میں وہ ایسی بےوقت موت نہیں مرے گی۔ بیوی کے نام پر اس سے بڑا کام کیا ہوگا۔

پنڈت جی کا پرارتھن سن کر میں نے دس ہزار روپیہ مندر کو دے دیا۔ باقی کا سب اپنی چھوٹی لڑکی کے بنک کھاتے میں رکھ دیا۔ آخر اسے ابھی کئی برسوں تک اسکول جاری رکھنا ہے۔

۶

میں نے بتایا تھا نا… کہ فیکٹری دیکھتے ہی دیکھتے نجانے  کہیں سے نمودار ہو گئی  تھی۔ ساتھ ہی کماد کی اگائی شروع ہو گئی …ہیلی کاپٹر؟ ہاں … فیکٹری کے نمودار ہونے سے پہلے تین مہینے  تک ایک ہیلی کاپٹرہمارے  گاؤں کے اوپر منڈلاتا رہا۔ اور کر بھی کیا سکتے ہیں؟ پانچ سال کے دوران جوان سے لے کر بوڑھے تک ہر شخص فیکٹری میں کام  کرنے لگا، چاہے وہ کام گنے کے پھوگ کی صفائی ہی کیوں نہ ہو۔ گنے کی دھول جمع کرنے کیلئے بھی ایک خاص ٹیم بھرتی کر لی گئی تھی۔ ان کی زبانیں تازہ پانی کے تالابوں کی کورالی اور لُولا مچھلی کی بجائےٹین میں بند گلابی سامن کی عادی ہو گئیں۔کیا کہا؟ تازہ پانی کی مچھلی میں ٹین بند سامن سے زیادہ غذائیت ہوتی ہے؟ سارڈین سے بھی زیادہ؟ یہ بات کسے بتانا چاہتے ہو؟ کون سی غذائیت؟ اب تو ہمارے گاؤں کو مچھلی  سے بھی زیادہ ٹین والی ڈبیا زیادہ بھاتی ہے اور اس کے گرد لپٹا کاغذ جو ڈبیا میں کیا کیاہے اس کی تشہیر  کرتاہے۔ ہمارے نوجوان لڑکے لڑکیاں یہ سوچتے ہیں کہ وہ واقعی میں چمکیلے کاغذ میں لپٹی روپہلی مچھلی کھا رہے ہیں۔ حتی کہ ہمارے گاؤں کے بڑے سیانے بھی … بات بھی تو  صحیح ہے۔ اب تازہ پانی کے تالاب  ملتے ہی کہاں ہیں؟ ندی نالے … میں نے بتایا نہیں کیا؟ ایک دن فیکٹری کا ظہور ہوا اور دوسرے ہی دن  سب کے سب چشمے سوکھ گئے۔ ایسا سوکھا پڑا کہ رات کے پچھلے پہر جب گلیوں میں روحیں راج کرتیں، بوڑھے پیڑ پانی کی کھوج میں نکل پڑتے۔ ہاں۔ مجھے کون کا ایک ایسا درخت بھی نظر آیا جس نے کمپنی کی زمین میں جڑیں ڈال لی تھیں۔ پانی کی کھوج کے بعد وہ باڑ کے پاس اپنی پرانی جگہ کو کھسک رہا تھا۔ مینک دریا سے جڑے کسی چشمے کا پانی نہ ملا تو اس نے  انچ انچ کھسکتے ہوئے کودا ندی کا رخ کیا اور تب وہ آدھی رات کو اپنی پیاس بجھا کر واپس لوٹ رہا تھا۔

پرسوں جب صبح کا ستارہ افق پہ نمودار ہوا …تو جھلساتی گرمی کے مارے میری آنکھ کھل گئی۔ میں صحن کے دوسری طرف گھر کے پیچھے بے چھت کے باورچی خانے کی طرف جا رہا تھا کہ وہاں پڑے پانی کے مٹکے سے ہونٹ بھگو لوں کہ مجھے چالیس فٹ لمبا بُرُوتھا کا پیڑ دکھائی دیا جو لکڑہاروں سے بچتا بچتا وہاں آن نکلا تھا، اور اب سلاکندا ندی کے کنارے اپنی پیاس بجھا کر واپس رینگ رہا تھا۔

۷

وہاں … اگر تم اپنے کان فرش کے تختوں پر لگا کر دھیان سے سنو تو … وہ تمہیں بولتے سنائی دیں گے۔ وہ سب کے سب۔ الگ الگ دھنوں میں، الگ الگ ڈھنگ سے۔ مگر سب ایک ہی سندیسہ دینا چاہتے ہیں۔ چاہے وہ بتالہ کے قبرستان میں سوئے ہوں، ولاوایا کے قبرستان میں یا ولاسہ کے کھیت کے پاس والے قبرستان میں۔ وہ سب یہی کہتے ہیں کہ فیکٹری کا نہ تھمنے والا اور زمین کو دہلا دینے والا شور انہیں چین نہیں لینے دیتا۔ تمہیں سنائی دیا نا؟ سری دارا بھی اس ہجوم کا حصہ ہے، چیخ کر کہتی ہے،ان سے کہو وہ چیختی چنگھاڑتی موٹر بند کر دیں جو ماں دھرتی میں بھونچال لاتی ہے اور ہمارے منہ میں مٹی بھر دیتی ہے… تمہیں ان کی سرگوشیاں سنائی دے رہی ہیں نا؟ وہ کہتی ہے … اسے روکو … جلا دو اسے… روک دو۔ ورنہ  ہر طرف اور فیکٹریاں کارخانے بھی نکل آئیں گے اور ہم سب کو نگل لیں گے ۔ ایک رات کی نیند بھی حرام کر دیں گے۔ جیتے جاگتوں کی نیندیں بھی چھین لیں گے۔ آسمان سے اور فیکٹریاں ٹپک پڑیں گی… وہ بول رہے ہیں… وہاں …وہاں … سری دارا کہہ رہی ہے ہم تو بس مزدور ہی ہیں۔ ان فیکٹریوں کے مالک دھرتی ماں کا پانی چوس لیتے ہیں۔ ہمارے کنووں… ہماری مٹی کا رس چوس کر اپنے دیسوں میں لے جاتے ہیں۔

ارے دیکھو تو! اپنا بدن گنے کے تپتے رس میں لپیٹ کر سو جانے کے بعد ہماری سری دارا کو ان باتوں کا کتنا گیان ہو گیا ہے۔ اچنبھے کی بات ہے نا! جیتے جی اگر کوئی چیونٹی بھی پانی میں جا گرتی تو وہ اسے بچا لیتی… کتنی کٹھور ہو گئی ہے وہ۔ شاید اس لئے کہ اسے مرنا پڑا، تپتے ہوئے سرخ شہد کی گرمی جھیلنا پڑی جس نے جیتے جی اس کی کھال جھلسا دی، شاید اسی لئے وہ اب ایسے چیخ چلا رہی ہے… مجھے نہیں لگتا کہ  یہ دردناک داستان سن سن کر میں چپ رہ سکوں گا۔

۸

وہ دور تک پھیلی باریک ذروں والی ریت پر چلتارہا،کبھی کبھار پانی کے چھوٹے چھوٹے جوہڑوں کو پھلانگتا جن میں ہلکی پیلی چاندنی جھلک رہی تھی۔ کبھی کبھی پیروں سے کسی مردہ مچھلی کو ریت میں دبا دینے کیلئے رک جاتا جس کی گلتی سڑتی چمکتی ہوئی نرم ملائم جلد مکھیوں کے ہجوم تلے دبی ہوتی۔ اپنی خوراک کے کھو جانے پر مکھیاں کسی اور دعوت کی تلاش میں کسی اور طرف کا رخ کرتیں۔

ریتلے میدان کے آخر میں تیز وولٹیج کی ایک برقی باڑ کماد کے کھیتوں کی جنوبی سرحد کی نشاندہی کر رہی تھی جو بتالہ کی شہری آبادی تک پھیلے ہوئے تھے۔ زمین پر ندیکمبا گھاس سو رہی تھی۔ چبھتی ہوئی جھاڑیوں پر لیٹے لیٹے وہ  رینگتا ہوا اوپر لگی باڑ اور چوکیداروں کی نظر وں سے بچتا بچاتا کماد کے کھیتوں میں داخل ہو گیا۔ گنے کے پھوگ پر پیر رکھتا کسی جبلی حس کی رہنمائی میں وہ کھیتوں کے بیچ رینگنے لگا۔

رات کا آخری پہر تھا جب ناگ اور دوسرے سانپ سنپولیے بھوجن کی تلاش میں بلوں سے باہر آ جاتے ہیں۔ آدھی رات کے بعد کے اس پہر میں چاند ہاپوتالے کے پہاڑی سلسلے پر اترتا ہے اور بُدماگلویا جنگل کے جھنڈ پر صبح کا ستارہ  چمکنے لگتا ہے۔ آسمان پر اڑتے ایک ننھے سرمئی پرندے کی تیز آواز سنائی دی۔ اس نے ایک لمحہ رک کر پہلے پرندے کی طرف دیکھا جو چاندنی میں نہائے آسمان کے پار اترنے کی کوشش کر رہا تھا پھر پیچھے مڑ کر اب تک کے طے کئے فاصلے پر نظر ڈالی۔

اسے لگا کہ اس کے پہلو سے بندھا تیل کا کپا کھلنے والا تھا۔ اس نے  ہر چیز کو ساتھ جوڑے رکھنے والی سیاہ بیلٹ کو پھر سے کس لیا۔ ایسا لگتا تھا جیسے اس نے کوئی بیس گز ہی طے کئے تھے۔شاید اتنا چلنے اور احتیاط کی وجہ سے اس کے اعصاب تناؤ کا شکار تھے۔ اسے تھکن محسوس ہوئی اور تمباکو کی طلب ہونے لگی۔ پھر اپنے آپ سے یہ وعدہ کر کے کہ سفر کے اختتام پر وہ اپنے آپ کو اس عیاشی کا تحفہ دے گا وہ پھر رینگنے لگا۔

صبح کی اوس میں جھکے جھکے گنوں کے ایک جھنڈ  میں جیسے کینچووں کی طرح جان آ گئی اور گنے کے پتے اسے ڈسنے لگے۔ درد کی ٹیس سے اس کے خون کی گردش اور دل کی دھڑکن تیز ہو گئی۔ جوش میں وہ اور تیزی سے آگے بڑھنے لگا۔ صبح کی آمد اور نایاب مقامی پرندوں کے سنگیت پر اووا کے صوبے میں آدھی رات کا گہرا نیلا آسمان بنفشی ہونے لگا۔ اسی لمحے اسے احساس ہوا کہ وہ چوکے بغیر فیکٹری کے پیچھے اگے گنے کی تنگ گلی تک رینگتا ہوا پہنچ گیا تھا۔

لو سری دارا، میں آ گیا۔ تمہارا وعدہ نبھانے۔

اپنے آپ سے بڑبڑاتے ہوئے اس نے پہلو سے بندھے تیل کے کپے کو کھولا۔ گہری سانس لے کر اس نے گنے کے موٹے تنوں سے ٹیک لگا لی۔ وہاں لیٹے لیٹے اس نے گودام میں پڑے بچے کھچے پرانے ٹائروں اور پلاسٹک کے تھیلوں کے بارے میں سوچا جو خشک گنے کے کوڑے کے ساتھ فوراً آگ پکڑ لیں گے۔ گنے کی فیکٹری بھڑکتی ہوئی آگ میں جلنے لگے گی اور اس کے ساتھ ہی سب کچھ آگ کی لپیٹ میں آ جائے گا۔ اور اس شاندار تماشے کو آلیہ برانڈ کی یہ دیاسلائی شروع کرے گی۔ جب کوئی بائیں ہاتھ کے انگوٹھے سے ماچس کی ایک طرف لگی پٹی کو رگڑتا ہے تو جو خوشبو پیدا ہوتی ہے وہ دل کو خوشی سے بھر دیتی ہے۔ اس نے آہستگی سے اپنی دھوتی اتاری، اسے مکمل طور پر مٹی کے تیل میں بھگویا اور پھر دوبارہ پہن لیا۔وہ دیا سلائی سلگانے اور پھر گودام کی آدھی دیوار پر کودنے کیلئے اٹھا۔ دیا سلائی سلگانے سے پہلےاسے لگا کہ کوئی مکوڑا اس کے کان میں گھس کر رینگنے لگا تھا۔ اس نے خارش زدہ کان کو کھجاتے ہوئے اپنا سر گھنے گنے کے جھنڈ کی طرف جھکا لیا۔

۹

“م“میرا نام گامنی رتھنائیکے ہے۔ عمر چونتیس سال۔ پتہ نمبر ۲۲ بُرُتھا جنکشن بُتالہ۔ میں عام سا پیادہ سپاہی تھا۔ ریٹائرمنٹ سے پہلے میری آخری تعیناتی گجبا رجمنٹ میں تھی۔ خوش قسمتی سے ایک مشن کے دوران میری بائیں ٹانگ پر گولی لگ گئی۔ پھر مجھے فوجی بینڈ میں ڈال دیا گیا جہاں زخم اچھا ہونے کے بعد میں جنوب کا گیتابرا ڈھول بجایا کرتا تھا۔ ۵۵ برس کی عمر میں میں ریٹائر ہو گیا.”۔”

“اچھا، ٹھیک، اب یہ بتاؤ اس رات کیا ہوا تھا؟ کیا ہوا کہ تمہیں دو بار گولی چلانا پڑی؟ “

“دسویں کی صبح میں نے ایک بہت برا خواب دیکھا۔”

“ا“ارے۔ تمہارا کیا خیال ہے کہ تم ولاوایا بار میں ہو کہ یوں سگریٹ سلگا لی۔ ویسے بھی یہاں خوابوں کا کوئی عمل دخل نہیں۔ بس ہمیں یہ بتاؤ کہ تم نے گولیاں کیوں چلائیں۔ ہمیں اس واقعے کی رپورٹ لفظ بہ لفظ مجسٹریٹ کے سامنے پیش کرنی ہے۔”۔ “

“د“دس تاریخ کو شام کے ساڑھے پانچ بجے میں سائیکل پر گنے کی فیکٹری میں داخل ہوا۔میں گھر سے صرف اپنا شام کا کھانا اور سگریٹ کا پیکٹ لایا تھا۔ پانچ سگریٹ بچے تھے اس میں ابھی۔ حاضری کا رجسٹر بائیں ہاتھ کی عمارت کے آخر میں ایک کمرے میں پڑا ہوتا ہے۔ میں نے سائیکل کو پارکنگ لاٹ میں کھڑا کیا اور دفتر میں چلا گیا۔ جوتھی نے سہ پہر کی شفٹ کی نگرانی کی تھی ۔ اس نے بندوق شیلف پر رکھ کر اپنا نام حاضری کے رجسٹر پر لکھا۔ میں نے بھی اپنا نام  اس کے نام کے نیچے لکھ دیا۔ ہاں۔ عام طور پرمجھے بس تین گولیاں ملتی ہیں۔ ایک گولی لوڈ کرنے کے بعد ہم  کھیتوں کی چوکیداری کیلئے چلے جاتے  ہیں۔ ویسے تو دو سو ایکڑ کے رقبے پر پھیلے کماد کے کھیتوں کے گرد بجلی کی باڑ بھی لگی ہے اور چاروں طرف نگرانی کے کیمرے بھی لگے ہیں مگر ہمیں رات کو کم از کم ایک دفعہ پورے رقبے کی نگرانی کیلئے گشت کرنا پڑتا ہے۔ یوں سمجھیں یہ ایک رسم کی طرح ہے۔

اگر آپ چاہیں تو یہ لکھ بھی سکتے ہیں صاحب جی کیونکہ ہم گاؤں والوں کو یہ کیمروں کا فیشن آنے سے پہلے بھرتی کیا گیا تھا۔ اس لئے انہوں نے ابھی تک ہمیں کام پہ رکھا ہوا ہے کیونکہ ہم لوگ مفید ہیں نا۔ بجلی چلی جائے تو فیکٹری والوں کے پاس یہ بڑے بڑے جنریٹر بھی ہیں۔ جی صاحب جی۔ ہمارے حاضری والے رجسٹر بھی ان بڑے بڑے جنریٹروں کے پیچھے پڑے ہوتے ہیں۔

جی، بجلی کی باڑ بیس پچیس سال سے کھیت کی رکھوالی کر رہی ہے اس کے باوجود جانور کھیتوں میں گھسنے کی راہ نکال ہی لیتے ہیں۔ آج کل کے جنگلی سؤروں کو مٹی کھودنا، بجلی کی باڑ کے نیچے سے رینگنا اور گنے کے کھیت کے اردگرد کیڑے مکوڑوں اور چوہے نیولے پکڑنا، سب آتا ہے۔ تیئس تاریخ کو میں رات کا آخری گشت لگا رہا تھا۔کوئی پونے چھے یا چھے بجے کا وقت ہوگا۔ میں نے ایک مور کی آواز سنی۔ مجھے پتہ ہے کہ کھاتاراگاما دیو⁵ یونہی صبح صبح  نہیں بولتے، کسی خاص وجہ کے بغیر.”۔”

“ا“اچھا اچھا اب جلدی جلدی بتاؤ۔ تمہاری بندوق سے دو گولیاں کیسے نکلیں؟ ترنت۔ ہمیں اور بھی بہت سے کام ہیں۔”۔”

“آ“آہ، اس وقت، میں فیکٹری کی مشرقی طرف تھا جہاں گنے فیکٹری کے صحن پر جھکے ہوئے ہیں۔ میں بائیں طرف سے صحن میں داخل ہونے والا تھا کہ میں نے دیکھا، گنوں کے ایک جھنڈ میں  غیرمعمولی سی ہلچل ہوئی۔ میں نے وہیں رہگذر سے دیکھا۔ یکایک بندوق میرے کندھے سے اتر کر میرے گالوں سے آن لگی تھی اور میری انگلی  اس موٹے جنگلی سؤر کا نشانہ لینے کیلئے لبلبی پر آ گئی جو منہ سے جھاگ نکالتا میری طرف دوڑ رہا تھا۔ وہ موٹا سؤر کوئی ڈیڑھ دو سو سیر کا تو ہو گا۔ جی صاحب بہت بڑا سا جانور تھا۔ آنکھوں سے لال بھورے شعلے نکل رہے تھے۔ جسم بالوں سے بھرا ہوا۔ہاتھی کے بچے  جیسا لگتا تھا۔ میرے دیکھتے ہی دیکھتے اس نے ہوا میں میرے سامنے چھلانگ لگائی۔ تب تک میں لبلبی دبا چکا تھا۔ جب تک دھواں چھٹا میں نے بندوق دوبارہ لوڈ کر لی تھی۔ مگر گنے کی گھاس پر کوئی جانور بھی نہ گرا۔ اس بات کے ڈر سے کہ وہ چالاک جانور پھر کہیں سے نہ آن ٹپکے میں نے دوسری گولی گھاس کی طرف چلا دی۔ پتہ نہیں شاید اس وجہ سے کہ میں نے بڑے عرصے بعد، کوئی ساڑھے چار سال بعد کوئی  بندوق  ووندوق چلائی تھی، میں جھٹکے سے زمین پہ جا گرا۔ تھوڑی دیر بعد میں دوبارہ اٹھا اور دیکھا کہ سورج کی پہلی کرنیں کھیتوں پر  پڑ رہی تھیں۔ میرا پورا جسم پسینے میں ڈوبا تھا۔ میں گھٹنوں کے بل اٹھا اور تیسری گولی لوڈ کی۔ مجھے ابھی تک خدشہ تھا کہ جانور حملہ کرنے ہی والا تھا۔ پھر میں نے سگریٹ کا پیکٹ نکالا۔”۔”

“ا“تمہاری سگریٹ نوشی گئی بھاڑ میں۔ یہ بتاؤ تم نے کیا دیکھا۔ کام کی بات پہ آؤ۔”۔”

“ا“میں نے دیکھا جانور کے جسم سے خون اچھل رہا تھا۔ اتنا اونچا کہ ساتھ پڑے گنے کے ڈھیر تک پہنچ رہا تھا۔ میں نے سوچا آج ہم سب، اس شفٹ پر کام کرنے والے اور آس پڑوس کے گھروں میں رہنے والے بھی جنگلی سؤر کا گوشت کھائیں گے۔ میں نے سگریٹ سلگائی  اور گنوں کے بیچ سے جھانکا۔ اب اس کے خون کا بہاؤ بہت کم ہو گیا تھا۔ پھر میں نے دیکھا گونیرس آیا نےجنگلی سؤر کی جگہ لے لی تھی ۔ وہ زمین پہ آلتی پالتی مارے بیٹھا تھا، بدن پہ صرف لنگوٹ کسا ہوا تھا۔ اس کی دھوتی اس کے سینے سے چمٹا ہوئی تھی۔ پورے کی پوری بھیگی ہوئی تھی۔ شاید کپی کے تیل سے۔ اس کا دایاں کان اور سر کاحصہ پورا کچلا ہوا تھااور اس کی مانگ سے خون ٹپک رہا تھا۔ میرے دیکھتے ہی دیکھتے خون بند ہو گیا۔ اس کا بدن گنوں سے ٹیک لگائے ہوئے تھا۔ کپی کے ساتھ ایک بیڑی اور آلیہ برانڈ کی ماچس کی ڈبیا تھی جو ایک طرف گر گئی تھیں۔

صاحب جی اس مور دیوتا کی قسم جس نے صبح صبح آواز لگائی تھی، قسم سے میں نے تو ایک بہت بڑے جنگلی سؤر پہ گولی چلائی تھی جو کم سے کم بھی دو سو سیر کا تھا۔ جی مجھے ابھی تک اس کے سینگ، اس کے نوکیلے دانت یاد ہیں۔ اس کی آنکھیں۔ جن سے لال بھوری چنگاریاں نکل رہی تھیں۔ میں نے گونیرس آیا پر گولی نہیں چلائی صاحب جی، اس  سؤر پہ چلائی تھی، قسم سے۔ مگر جب بندوق کی گرمی اور بارود چھٹا تو وہاں گونیرس آیا پڑا تھا۔”۔ “