تجدید مراسم کا ہو میثاق؟ مگر کیوں؟
ہر بار اُڑانی ہے وہی خاک مگر کیوں؟

کرتا ہوں میں کیوں پیش صفائی ترے حق میں
لا شے کو بناتا تو ہوں افلاک، مگر کیوں

پل پل میں بدلتی ہوئی رت ہے مجھے درکار
ایسی متذبذب ہے مری خاک مگر کیوں

ہر ایک شرارت مرے کوچے سے گزر کر
ہنستے ہوئے ہوجاتی ہے نم ناک۔ مگر کیوں

بنتا ہی نہیں خونِ جگر زینت تحریر
پھٹتے ہیں مری جلد کے اوراق مگر کیوں

سینے کو تڑپ ہے کہ کوئی ہو ترے جیسا
ایسا ہو کوئی سادہ و چالاک مگر کیوں

ڈھب اور بیانِ غمِ دل کا ہو تضاد اب
ہر دوسرے مصرعے میں جگر چاک، مگر کیوں